أنا سامي بالنور شاب تونسي قريت الابتدائي والثانوي في مدرسة نهج "انغلترا" في تونس والثانوي قريتو في العلوية (المعهد العلوي بمنفلوري) بعد الباك قريت اقتصاد وعلاقات دولية في جامعة المنار وين تحصلت على الاجازة.
من صغري كنت مغروم بالاعلام وبالتلفزة وكنت نلوج على الفرصة، سمعت إنو برنامج شمس الاحد الي كانت تقدم فيه هالة الركبي عامل "كاستينغ" باش ادخل شبان جدد وبالرغم من انو عمري كان صغير مشيت وقدمت روحي في الكاستينغ وقبلوني بسرعة.. متتصوروش قداش كانت فرحتي ..اول فرصة ليا باش ندخل للعالم الي نحبو عالم الكاميرا والتلفزة ...وبدات الحلمة
في برنامج شمس الاحد كلفوني باش نقدم فقرة رياضية وبعد كلفوني باش نعمل ربورتاجات غادي بديت نتعلم في تقنيات عالم الاعلام وبديت نكون روحي في المجال التقني....بعد تجربة شمس الاحد خدمت في الانطلاقة متاع قناة حنبعل وقدمت برنامج على المهرجانات والصيف ...بعد تجربة حنبعل خدمت قنوات اجنبية في مجال ربورتاج والقصة الصحفية....بعد دخلت لشركة كاكتوس وخدمت في برنامج الحق معاك مع معز بن غربية..كيف كانتلي تجربة مع اذاعة اكسبراس افم .....وفي كل تجربة نحتك بناس اقدم مني في مجال الاعلام نتعلم منهم ونطور امكنياتي.... بعد الثورة بديت في برنامج يوميات مواطن سنة 2012..
نعرف الي البرامج الاجتماعية العميقة من اصعب البرامج وطريق الشهرة فيهم طويل برشة باعتبار انو الي ماشي في تونس اليوم هوما برامج "Buzz" لكن انا نحب البرامج الاجتماعية ونحب نكون صوت الناس الي معندهمش صوت ونحب نوصل معاناة الناس والصعوبات الي اعيشوها وقصص النجاح الجميلة...بالنسبة ليا لذة العمل بالنسبة ليا خدمة الناس ..
برنامج يوميات مواطن لازم يتواصل ولازم يتطور وانا شخصيا نطمح باش نعمل افلام وثائقية اجتماعية ...
البرامج الي نرفض تقديمها هي البرامج السياسية خاصة الي فيها خصام وعرك في بلاتو..
الشباب الي حب يخدم في مجال الاعلام نقلوا اسرار النجاح هي الغرام وحب المجال هذا والسعي الي التطور وثنيان الركبة ...الاعلام عالم جميل وتنجم تحقق فيه برشة مكاسب المهم هو الاجتهاد والاجتهاد والبحث على تطوير الذات...